ارباب عشق

 

 

سئوال و جواب امام(ع) با حضرت ابوالفضل (ع)امان نامه

. .

مرحوم انور اردبیلی

.

ای لشکریمون سرور و سرلشکری قارداش

 

وی حق الینون الده کسن خنجری قارداش

.

 .

مانع دگلم قارداشوی ترک ایدوسن ایت

 دشمندن امان نامه گلوبدور گیدوسن گیت

.

 .

یولاردا دوزوبسن نچه آیدور زحماته

 دائم دیموسن جان بلورم خوردا بناته

 من ئولملیم چک اوزوى سوى نجاته

 سن هر نیه راضی اولاسان منده رضایم

 گیتسونده گیدوبسن ابداً یوخدی گلایم

.

 .

حاشا بو قوشون طالب اولا صلح و صفایه

 سن مندن اوتانما اوزوی سالما بلایه

 لشگر بو هدفله جمع اولوب کرب و بلایه

 توکسون بالالاریم یوزینه گوز یاشین ایستور

 سعد اوغلی حسین ابن علینون باشین ایستور

.

 .

طوفان بلا بو گیجه نون وار سحرینده

 ریحانۀ زهرا سولاجاق ظلم اثرینده

 ئولمک ولى آساندی حسینون نظرینده

 گوگلوم سحرون فیضنه پرشوق و هوسدور

 گیتسون هامی تک صودامر اوغلوم منه بسدور

.

 .

ای قاف وفاده اولان عنقای وفادار

 صیادلرون دامنه سن اولما گرفتار

 شیریندی جان مهلکه دن جانوی قورتار

 گیت کرب و بلادن اوزوی سالما کمنده

 عزم وطن ایله منه یاس ساخلا وطنده

.

 .

گر ام بنین آغلاسا چوخ گوگلون آلارسان

 هر هفته مریضه بالامی یاده سالارسان

 اما منه خاطر گیجه نی بیزده قالارسان

 معبودویله راز و نیازه دایانارسان

 محراب نمازیمده نمازه دایانارسان

.

 .

تز تز او لوسان قبر رسول اللهه زوار

 ایلرسن اونون تربتینه دردیمی اظهار

 سو ویرمدیلر اوغلووا ای احمد مختار

 بیر دشت غم افزاده سنون قرة العینون

 جان ویردی لب نهریده لب تشنه حسینون

.

 .

أی مظهر و اشرف خلف شاه ولایت

 بازوی توانای خداوند شجاعت

 واجبدی گرک من ایلیم درک شهادت

 مقتلده نماز اوسته باشیم آیریلا تندن

 گل سن بو اوزون قولاری کسدیرمه بدندن

.

 .

چوخ خدمت ایدوبسن بیزه ای مرد فداکار

 گیتسون منه قارداش گنه ده منفعتون وار

 گورمز بلیمون سنماقنی لشگر کفار

 میداندا حسینون ایله احوالی پوزولماز

 داغلار چکلن قلبده قارداش غمی اولماز

.

 #جواب

.

بو سوزلر ایدوب حالت عباسی دگرگون

 اسدی بدنی تتردى اول قامت موزون

 شرمنده لیک اوز ویردی اولوب خاطری محزون

 حسرتله گوز آلتی باجیسی زینبه باخدی

 رنگی دوتولوب آلننا خجلت ترى آخدی

.

 .

عرض ایلدی ای سرور دین عصرون امامی

 لطف و کرمونله منی سن ایله گرامی

 شاهلار قاپودان رسمیدی قومازلا غلامی

 خوشدور ره عشقونده گوزوم قانیله دولسا

 قوؤما منی شاها قانمون ارزشی اولسا

.

 .

حاشا پوزولا نقش وفا لوح دلیمدن

 فکرون بودی گر آیرلام اقوام و ایلیمدن

 آل پرچمیمی آچ صورا شمشیری بلیمدن

 سنکه قوئوسان نوکری ای شاه محسَّن

 بیهوده بو شمشیری نیه باغلامیشام من

.

 .

ای روح نبی روح روانیم سنه قربان

 جریان ایلین دلده که قانیم سنه قربان

 قورخوتما ئولومدن منی جانیم سنه قربان

 آماده ام هر امریوه اوچ قارداشیمیلا

 خدمت ایلیم من ایکی قول بیر باشمیلا

.

 .

ترک ایتماقمز خیمه وی امکاندان اوزاقدور

 جان هاردا مگر جلوۂ جاناندان اوزاقدور

 قویسوق سنی بو حالیله وجداندان اوزاقدور

 زهرایه گوره یا که آنام حیدره خاطر

 ساخلا بیزی سن اکبره یا اصغره خاطر

.

 .

ماهیت عباسوی سن یاخشی تانورسان

 محکمدی ارادم ولی چوخ ضعف ساتورسان

 وار اولما خلافیم دیمگه سن او تانووسان

 فرمایش ایله منده نه ایراد گورورسن

 ایرادیم اگر واردی نیه گزلدوسن سن

.

 .

سایه کیمی مدتدی دالونجا گزیرم من

 اوز خدمتیمی ایلیم اثبات و مبرهن

 دوران دولانوب دوره لیوبدور سنی دشمن

 خدمت گونومه نایل اولان وقته قوئورسان

 حق لطفی منه شامل اولان وقته قوئورسان

.

 .

هیهات بو نفس و بو علاقه اولا منده

 سنسیز ایلیم روحیمی زندانی بدنده

 بیر نچه گون آسایش ایدم ملک وطنده

 قالسام دیری سندن صورا ای سرور ممتاز

 گیتسم وطنه ام بنین منله دانشماز

.

 .

سنسیز منه گر وئرسه لر اجلال جهانی

 بیر مویجه یوخ ارزشی آخر اولی فانی

 خوشدور ایکیمز مدفن ایدک کرب و بلانی

 یات اکبرله أصغری سن ساخلا قوجاقدا

 من نوکرم اما یاتارام سیزدن اوزاقدا

.

 .

انور سوزی الهام ایلسه ملهمی غیبی

 عارفلرون اولماز او سوزه ذرۀ عیبی

 وار شرطی گرک گیمیسن جامه ریبی

 نقصان یتیشر هر عمله ریبه و ریادن

 خالیدی ریاکار عملی صدق و صفادن

 

نظرات شما عزیزان: